இராமலிங்க அந்தாதி - 4

அருட்பெருஞ்ஜோதி                அருட்பெருஞ்ஜோதி

தனிப்பெருங்கருணை               அருட்பெருஞ்ஜோதி

 எல்லா உயிர்களும் இன்புற்று வாழ்க  

https://drive.google.com/file/d/0B-1Hedu-YZTWOGNLaEJDdkIxNms/view?usp=sharing

               இராமலிங்க அந்தாதி          (05-07-2015)

(தி.ம.இராமலிங்கம்)

நேரிசை வெண்பா

அண்ட விரிவென்னும் அனந்த அலையை

பிண்டத்தின் உள்ளே பாரப்பா - உண்பது

அனைத்தும் அந்த அண்டமே ராமலிங்கமே

கனையாகி அதனைக் கடந்தான்.

கடவுள் நிலையறிய கருணை வேண்டும்

அடங்கலு மறிய அம்மயமாவாய் - சடங்குகளைக்

கட்டி அழக் கூடாதே ராமலிங்கமே

விட்டதினால் பெற்றதே வரம்.

வரம் வேண்டுபவர்க்கு வம்புகள் எதற்கு

சிரம்நாடி யவனை சிக்கெனப்பிடி - மரக்கறி

உணவே வரமா யிருக்க ராமலிங்கமே

பிணக்கறி உண்டால் பிணிதான்.

பிணிமூப்பு மரணப் பயல்களை தடுக்கவே

மணிமன்றில் ஏறி மன்றாடு - பணிசெய்

திருந்தால் பிணி இல்லையென ராமலிங்கமே

குருவாகி சொன்னான் கனித்து.

கனிந்த எக்கவியும் கடவுள் அருளன்றி

இனிக்குமோ கனிந்து என்பயன் - சனி

பாம் பிரண்டிற்கு பயந்தோ ராமலிங்கமே

நாம் சன்மார்க்கம் நடத்துவது.

நடக்கும் செயலெலாம் நாதன் அறிவான்

மடமென்று மாளிகை மாயைஏன் - அடங்க

மறுக்கும் மாயா மடத்தை ராமலிங்கமே

அறுக்கும் தந்திரம் அறிவான்.

அறிவிக்க அறிந்த உண்மை சிலவே

பறித்தறிய வேண்டியது பலவாம் - குறிபார்த்து

அடிக்கும் இடம் எதுவென ராமலிங்கமே

நடித்த அருட்பாவில் நாடுவாய்.

நாடுகின்ற எல்லாம் நலந்தருமோ உன்

வீடு சொந்தமாக வேண்டாமா - சாடுகின்ற

எதையும் விட்டா யெனில் ராமலிங்கமே

அதைச் செய்வான் அன்று.

அன்றென்றும் இன்றென்றும் என்றென்றும் கூறும்

தன்னிலையை மறப்பதே தயவு - அன்பனாகி

சுத்த சன்மார்க்க செயலால் ராமலிங்கமே

பித்தமெனும் காலம் போக்குவான்.

போக்கெல்லாம் தெரிய போகத்தை விட்டு

ஆக்கையை நிறுத்து ஆங்கே - தூக்கத்தை

தடுக்க ஒரு தந்திரத்தை ராமலிங்கமே

விடுத் தென்னை விடுவி.                           310

விடுக்க நினைத்தும் வந்து ஒட்டுமிந்த

சடுகுடு ஆட்டம் சகிக்குமோ - கடுகடுத்து

சொல்லினும் ஆசை சீறி ராமலிங்கமே

கொல்லி வைக்கக் குலையுதே.

குலையும் உடம்பை குருவருளால் நாம்

கலை யாக்குவதே காருண்யம் - சிலை

வணங்கி மலை வலம்வர ராமலிங்கமே

குணம் மாறுமோ கூறு.

கூறும் குற்றமெலாம் கலைந்த சாதுவிற்கு

தூறும் சன்னியாசம் தேவையில்லை - ஊறும்

கருணை யுடைய காயத்தார்க்கு ராமலிங்கமே

அருளி வெள்ளாடை உடுத்துவான்.

உடுத்த மூவாசையில் உறவுள்ள சித்தர்கள்

கடுத்த காவிஉடை கட்டவேண்டும் - விடுத்த

பேரார்கள் தயவைப் பெற ராமலிங்கமே

பூரா ஞானம் பொழிவான்.

பொழிகின்ற மழையின் பாதையை அறிந்தால்

ஒழிகின்ற தேகம் ஓங்குமே - பழிக்கின்ற

உலகில் நாமும் உயர ராமலிங்கமே

மலங்கள் மூன்றும் மாய்ப்பான்.

மாய உலகிடையே மேய வந்ததுபோல்

காய தேகத்தில் காமம்வந்ததே - தூய

மாசு போக்கி மாண்புற ராமலிங்கமே

பேசும் ஒருவார்த்தை போதுமே.

போது மென்பது பலமில்லாதான் சொல்லே

சூது செய்தேனும் சாதுவாகு - மோது

உயிருள்ள வரை உருக ராமலிங்கமே

லயித்து தருவான் லாபம்.

லாபமென்பது ஞானதேக லட்சிய மடைய

ஆபத்தைக் கடக்கும் அனுபவம் - சாபமெலாம்

சாம்பலாக்க அருட் ஜோதி ராமலிங்கமே

ஆம்மென்று வருவான் அன்பர்க்கு.

அன்பர்க்கே ஞானசித்தி அறுபத்து நாலாயிரமும்

தன் சுதந்திரத்தில் தருவான் - என்நிலை

எதுவென நீ உரைத்து ராமலிங்கமே

அதுவாக்கி எனை ஆள்வாய்.

ஆளுவது மூளையாமன அலையா என்றே

மாளுவதில் காலம் மார்ச்சாலம் - நாளும்

எனை நீயே ஏற்று ராமலிங்கமே

உனைப்போல் அனாதி யாக்கு.                       320

அமைதி எங்கும் அமையட்டும் பிண்ட

சுமையை ஆன்மாவே சுமக்கட்டும் - நமை

நல்லதே அண்டட்டும் நாளும் ராமலிங்கமே

இல்லத்தில் என்று மிருக்கட்டும்.

கட்டுச் சோற்றுடன் காடுமேடு செல்லினும்

விட்டுப் போகுமோ வினை - எட்டடி

ஆழ்குழியும் அரையடியும் ராமலிங்கமே

ஊழ்வினையாலும் விரும்பேன் உண்மை.

உண்மை அறிந்துமதை உணரும் பக்குவம்

கண்ணிமைபோல் மறைத்துக் காட்டும் - எண்ணில்லாத

சித்தர்கள் கூடு சிதைத்ததைப்போல் ராமலிங்கமே

அத்தவற்றை நான் இழையேன்.

இழைத்தப் பிழையெலாம் இரங்கி பொறுப்பானென

விழைந்து பிழையை வளர்க்காதே - மழையும்

விழுமிடம் பொறுத்தே வாழும் ராமலிங்கமே

அழுமிடம் வந்து அருளாய்.

ஆய்ந்த மதங்களிலே இந்து மதமொன்றே

தாய்மதம் தந்தையே தெய்வம் - ஆயினும்

பேய்யென பிடிக்கப் பார்த்தால் ராமலிங்கமே

நாய்யென அடிக்க நீட்டு.

நீடுகின்ற வானில் நடிக்கின்ற அண்டங்கள்

வீடுபோய் சேரும்நேரம் வந்தது - ஆடுகின்ற

சேவடிகளின் பஞ்ச சேவைகள் ராமலிங்கமே

பூவது பூப்பது போன்றது.

அதுவாகும் ஆசையில் அத்தை நாடியே

மெதுவாகச் சென்றால் மறணந்தான் - சதுர்

மறையும் காணா மருந்தை ராமலிங்கமே

குறையின்றி அதிவேகத்திற்கு கொடுத்தான்.

கொடுக்கின்ற பாக்களை கரத்தினால் ஏந்தி

தொடுக்கின்றேன் அய்யன் தயவில் - சொடுக்கின்ற

காலத்தில் பல கதிர்களை ராமலிங்கமே

தூல தேகத்தில் தந்தாய்.

தந்ததை தன்மயமாக்க தயாசக்தி யெனும்

விந்தையை புரிய வாரும் - சிந்தை

மகிழ தயா மூலமான ராமலிங்கமே

அகிலமதை இன்பமாய் இயக்கு.

இயங்கும் உள்ளுடம்பு அசுத்தமின்றி நீடிக்க

தயங்காது கரிசாலைத் தருவாய் - உயர்ந்த

தூதுளை தினம் தந்தால் ராமலிங்கமே

மாதுளைப் போன்று மூடிடுவான்.                    330

மூடிய ஞானசபை மறையவன் வருகையால்

ஆடியேத் திறக்கும் என்றாய் - கூடியே

திறந்து ஜோதி திருவருளை ராமலிங்கமே

உறவாய்க் கேட்கிறோம் உதவுவாய்.

உதவும் கரணத்தால் உவட்டா இன்பத்தை

நிதமும் அனுபவிக்க நினைத்தேன் - பதம்பர

அமுதை எனக்கே அளிக்க ராமலிங்கமே

அமுதல் உவரை அறிவித்தான்.

அறிந்த சன்மார்க்கம் அனந்தமாகி அதில்

அறிந்த அனுபவம் அனந்தம் - குறித்த

சுத்த சன்மார்க்க சூழலை ராமலிங்கமே

இத்தருணத்தில் தர இரங்காய்.

இரக்கம் தருகின்ற இறவாதிருக்கும் பெரும்

வரத்தை வேறேது வழங்கும் - மரந்தரும்

கனியை சுவைக்கும் கண் ராமலிங்கமே

தனித்திருக்க தன்னையேத் தா.

தாமறை பொருளெல்லாம் தந்தால் தானே

தாமரை மலரும் தன்னுள்ளே - தாமதம்

என்றால் செய்வது ஏது ராமலிங்கமே

அன்றைய உன்புலம்பலா யானேன்.

ஆன வரையில் அழுது விட்டாய்

கானம் பலவும் காட்டிவிட்டாய் - தானம்

நிறைய செய்தும் நீஏன் ராமலிங்கமே

சிறை சென்றாய் சித்திவளாகத்தில்.

சித்திகொடுக்க தீட்சி செய்யவே பலர்

கத்தி அழைப்பதை காண்மினோ - புத்தி

அற்றார் மும்மலம் அறுப்பரோ ராமலிங்கமே

கற்றாரை கற்றாரே காமுறுவர்.

காமுறும் காந்தக் கண்களும் உன்புன்னகை

பூமுகமும் காணாமல் போவேனோ - பாமுகம்

பலகாட்டி உனைப் புகழ ராமலிங்கமே

கலகலவெனும் சிரிப்பைக் கேட்டேன்.

கேட்டதெலாம் உடன் கொடுத்தாய் பாடும்

பாட்டெலாம் ஏற்று புகழ்ந்தாய் - பூட்டெலாம்

திறந்து உள்ளே தரிசித்தால் ராமலிங்கமே

இறந்து பிறப்பது இல்லை.

இல்லாதன அல்லஇங்கே எம்மார்க்கமும் ஓர்

நல்மார்க்கமே கருணை நாட்டத்தால் - கல்லாத

சாகாக் கல்வியை சார்ந்தால் ராமலிங்கமே

ஆகாவென வாழ்த்தி ஆடுவான்.                     340

ஆடுமாடு தின்போர்க்கு ஆளும் தெய்வமேது

நாடுவிட்டு போனப்பின் நரகந்தான் - கூடுதுடிக்க

குருதி பிடித்து குடிப்பானை ராமலிங்கமே

திரும்பா நரகத்திலிட்டுத் திருத்து.

திருக்குறள் கூறியும் திருந்தா ஜென்மங்கள்

இருந்தென்ன லாபம் இங்கு - விருந்தென்று

புலை எனும் பிணத்தை ராமலிங்கமே

விலை கொடுத்து வாங்குவார்.

வாங்கின ஊறுகாயில் விழுந்தப் புழுவால்

ஓங்கிநீ கோப முறுகிறாய் - ஆங்கேநீ

புழுத்த உணவாம் புலாலை ராமலிங்கமே

கொழுக்க உண்ணுகையில் கோபமெங்கே.

எங்குமாய் விளங்கி எவ்வுயிரும் பெறும்

அங்கமாய் இருப்பான் இறைவன் - சிங்கமும்

ஊன் உண்பது இயற்கையோ ராமலிங்கமே

மீன் உண்பவனா மனிதன்.

மனித இயல்புக்கு மாறாக விலங்கினத்தின்

இனிய உயிரெடுத்து உண்ணலாமோ - கனியும்

காயும் பல்வகை கீரையும் ராமலிங்கமே

தூய உணவாம் தயவுடையார்க்கு.

தயவு உடையார்யாரும் தன்னுயிராய் பிற

அயலுயிரை மதித்து ஆள்வர் - மயங்கியப்

பலர் புழுத்த புலாலை ராமலிங்கமே

கலத்திலிட்டு உண்பது கொடுமை.

கொடுமை இதுபாரீர் கொடுத்துதவி நம்மில்

ஒடுங்கும் உயிரை எடுப்பதோ - அடுக்குமோ

புலால் உண்ணும் பழக்கமதை ராமலிங்கமே

அலாது யார் தடுப்பார்.

தடுப்பார் யாருமின்றி தருதலையால் கொலை

படுமிந்த விலங்கினங்களைப் பாராய் - விடுமுயிர்

வலியால் துடிக்க வலிந்து ராமலிங்கமே

பலி கொடுப்பதோ புசிக்க.

புசிக்கவே உயிரினங்களை பரிந்து வளர்த்து

பசிக்கு ருசிக்க பலியிடுவதோ - வசிக்கும்

உயிரின் உரிமை இழக்க ராமலிங்கமே

பயிற்று வித்ததெலாம் பாழோ.

பாழுமிந்த உலகில் பிறந்த உயிரெல்லாம்

வீழும் கொடுமை வீழாதோ - வாழும்

இன்பங்கள் தடை யுறாது ராமலிங்கமே

அன்பின் அலையாய் இரு.                          350

இரும்பு மனமோ உந்தன் வீட்டில்பிறந்து

அரும்பிய உயிரை அறுக்கலாமோ - வரும்

பிறவியெலாம் நல் பிறவியுற ராமலிங்கமே

அறத்தை ஊட்டு அகிலத்தார்க்கு.

அகிலமெலாம் இன்ப மன்றி துன்பத்தை

சகித்திடாது உயிர்ச் சரங்கள் - பகிர்ந்து

உண்ணக் காய்கறி உணவே ராமலிங்கமே

உண்மை உணர்ந்தோர்க்கு உணவாம்.

உணவுச் செய்து உண்ணவே மறுக்கின்றாய்

பிணங் கிடக்கையில் புசிக்கலாமோ - குணங்கெட்டு

சதைப் பிணத்தை சமைத்து ராமலிங்கமே

அதை வீட்டினிலுண்பது எஞ்சனம்.

சனங்களில் ஒருபிரிவைச் சாடியவன் மாடு

தினந்தின்பான் எனத் தொடமறுப்பாய் - இனத்தாரில்

ஆடுதின்பாரைத் தொடுவ தெப்படி ராமலிங்கமே

காடுகூட இவர்களைக் கொள்ளாது.

கொள்ளும் கொலைசெய்தக் கவல உணவை

கள்வனின் சுகம்போலக் கொள் - தள்ளியே

இருப்பாய் புற இனத்தாரிடம் ராமலிங்கமே

திருவாய் மலர்ந்தான் திடமாய்.

திடமாய் இருக்கவே தழைகளை உண்ணும்

உடல்களைத் தின்பது உயர்வோ - அடஅந்தத்

தழைகளை நாமும் தின்றால் ராமலிங்கமே

உழைக்கும் தேகம் உறுதி.

உறுதிகொள் நெஞ்சே உயிரெல்லாம் பிறப்பது

அறுத்துநாம் உண்பதற்காக அல்ல - உறும்வினை

நீக்கவே உடலெடுத்து நின்றதை ராமலிங்கமே

ஆக்கியதை தின்ப தாகாது.

ஆகாரமென நண்டுகோழி ஆடுமாடுகளைத் தின்றால்

போகாத் துயர்பட்டுப் போவாய் - நாகாக்க

சொன்ன வள்ளுவன் சொல்லை ராமலிங்கமே

பொன்னென பொறித்தான் பாட்டில்.

பாட்டியும் தாத்தாவும் படைத்த குலதெய்வமென

ஆட்டினை படைத்து அடிக்கின்றாய் - பாட்டியின்

சிற்றறிவா உனது அறிவும் ராமலிங்கமே

பெற்ற பேறறிவைப் பெறுவாய்.

பெறுகின்ற பேறால் பெற்றவள் மகிழ்வாள்

அறுபடு முடலாலிறைவன் அழுவான் - பொறுப்புடன்

இருவரும் மகிழ அகஇனமாக ராமலிங்கமே

திருவருள் மகிழத் தருவான்.                        360

தருகின்ற அனந்த தேகங்களில் மனித

உருவமே லேசில் எடுக்கப்படாது  - வருகின்ற

மாற்று தேகத்தை மாய்க்க ராமலிங்கமே

கூற்றின் செயலைக் கற்றோம்.

கற்றதனா லாயபயன் காசுபணஞ் சேர்ப்பதா

பெற்றதினா லானப்பயன் பாவங்களா - சற்றேனு

மிரங்கி உயிர்களைக் கொல்லாது ராமலிங்கமே

சரண மென்று சிந்தித்திரு.

சிந்திய ரத்தங்கள் சிதறிய உடல்களின்

விந்தும் நாதமும் வெந்ததே - அந்தக்கறிக்

கடை உயிரைக் கொல்லுதே ராமலிங்கமே

தடைசெய்ய உனக்கென்னத் தடை.

தடைபட்ட பிறவிகளை தயவுடன் பார்க்கும்

படைஎன்பதே மனிதப் பண்பாகும் - கடையுறும்

எறும்பும் அதனினும் அணுவும் ராமலிங்கமே

உறுபயன் காண உத்தமனாகும்.

உத்தமனாகும் உயிர்களை ஊன் உணவாக்கி

செத்ததைத் தின்று சுத்தமென்பாய் - வித்தையாய்

பட்டையை நெற்றியில் போட்டு ராமலிங்கமே

கட்டையை வாங்குவார் கறிக்கடையில்.

கறிக்கடையில் வெட்டும் கறியெலாம் நாம்

அறியாத நமதுஇன உறவுகளே - நெறியான

வாழ்வில் நாம் வாழ்வதற்கு ராமலிங்கமே

ஊழ்வினையே வாழ்வினை ஆகும்.

ஆகுமென இருந்தேன் ஆவிப்போக உடல்கள்

போகுதே கொலையுண்டு போகுதே - சாகும்

வரை துடிதுடிக்க வைத்து ராமலிங்கமே

அரைவீதியில் வைத்து ஆள்வர்.

ஆள்கின்ற ஞானசித்தன் ஆட்சியில் இன்னும்

வாள்கொண்டு உயிரை வெட்டுவதோ - நாளிரண்டு

சென்று கலியுகமும் சாய ராமலிங்கமே

வென்று சன்மார்க்கயுகம் வந்தது.

வந்தாரை வாழ வைக்கும் பூமியில்நாம்

நொந்தாரை உண்ணும் நோக்கமேன் - அந்தமுடன்

ஆதியைத் தேடும் உயிரினை ராமலிங்கமே

பாதியில் வெட்டி பசியாறுவர்.

பசிக்கு நல்உணவாம் பயிர்கள் அதுவல்லாது

நசித்து உண்ணும்ஊன் நாறும் - வசிக்க

வரும் உயிர்களை வெட்டி ராமலிங்கமே

தருகின்ற விருந்தெல்லாம் தவறு.                    370

தவறான பழக்கத்தில் தலைமுறை வளர்வதை

அவதானிக்க மறுத்தல் அவமானம் - இவனென்

சொல்வது என்று சென்றால் ராமலிங்கமே

பொல்லாத புலை போகாது.

போகாதே புறஇனமுன் பந்தசொந்தமே யாகினும்

ஆகாதே அவரின் உறவுநமக்கு - சாகாத

வாழ்வு பெற்றதமிழ் வானன் ராமலிங்கமே

ஏழ்பிறப்பும் நானானேன் அகஇனம்.

அகஇனம் என்றும் அசைவம் தொடாது

உகம்பல செல்லினுமிது உண்மை - நகக்

கண்சிறிது காயங் கண்டாலும் ராமலிங்கமே

கண்கள் சொல்லும் கருணை.

கருணை சிறிதுமின்றி கடைதனில் சென்று

கருக்கொழி முட்டை கேட்கின்றீர் - விரும்பி

உண்ண கருவை அழிக்கின்றீர் ராமலிங்கமே

எண்ணம் இழிவே எண்ணும்.

எண்ணத்தில் அறிவிருந்தால் எண்ணுவையோ உயிர்

வண்ணத்தை அழிப்பதா வாழ்க்கை - உண்ணும்

உணவினை சுத்த மாக்கு ராமலிங்கமே

பணம் பண்ணுவதெல்லாம் பாவம்.

பாவங்களின் பட்டியலைப் படித்தும் நம்அகம்

பாவம் போகவில்லை பாரும் - தூவும்

மழைச் சாரலாய் மேவும் ராமலிங்கமே

பிழையென்பது நம் பிணி.

பிணிபோக்க மருந்துண்டு பாரினில் இரக்கமே

அணியெனக் கொள்வதே அது - பணிந்து

ஆன்ம நேயம் உணர்ந்தால் ராமலிங்கமே

தான்னென உணர்ந்து தயவாவாய்.

தயவு மட்டுமே தலைதப்பும் உளவை

நயமாய் உரைக்கும் நாளும் - பயம்

போகப் புலை போகும் ராமலிங்கமே

ஏகமேபரம் பொருள் ஆகும்.

ஆகாத மூவாசை அடுத்தடுத்துப் போகவே

போகாத புலையாசையும் போனது - சாகாதத்

தலை ஒன்றைத் தந்தான் ராமலிங்கமே

மலையென நினைத்தது முடிந்தது.

முடிந்தன ஆசைகள் மயங்கியே வீழக்

குடித்தவன் எழுந்துக் குளித்தான் - படித்தவன்

போலினி புலையைப் போக்கி ராமலிங்கமே

கோலெனக் கண்டு கொண்டேன்.                     380

கொண்ட புழுப்புலையும் கொலைச் செயலும்

விண்டு சென்றநானே வீரன் - தொண்டு

செய்யு மோர் சித்தினை ராமலிங்கமே

மெய்யன்புடன் தந்து மகிழ்ந்தான்.

மகிழக் கண்டேன் மண்ணுயிரெலாம் இங்கே

நெகிழ்ந்து இறையாவது நிச்சயம் - பகிர்ந்த

அன்பெல்லாம் பண் பலையாய் ராமலிங்கமே

என்னகத்தில் சூழ எழுந்தேன்.

எழுந்த எழுத்தெல்லாம் என்னவன் சொல்ல

விழுந்த சன்மார்க்க வரமே - பொழுதெலாம்

உன்னையே பாடி எழுத ராமலிங்கமே

புன்படா உடம்பை பணித்தான்.

பணிகின்றேன் அவன் பொற்பாத அழகை

கணிதங் கடந்து களிக்கின்றேன் - மணிகள்

ஒன்பதும் ஒலித்து ஓங்கின ராமலிங்கமே

நன்னெறி பிடித்தேன் நன்றி.

நன்னன்று என்பதை நாடிலேன் தன்னையே

நன்னென்று அறிய நான்இல்லை - துன்பெலாம்

போயின என்று பேசின ராமலிங்கமே

தாயினும் தயவைத் தூண்டின.

தூண்டுமென் இதயத் திருக்கதவம் திறக்க

வேண்டுமென் அய்யாவே வருக - தீண்டும்

தீக் கதிர்களின் தன்மையை ராமலிங்கமே

ஆக்கமாய் அளித்தருள் அகத்து.

அகத்தே அசிங்கம் ஆயிரங்கோடி இருக்க

இகத்தே நல்லவன்போ லிருந்தேன் - வகர

தகரவித்தை கற்றுத் தெளிய ராமலிங்கமே

உகரமும் அகரமும் ஊட்டு.

ஊட்டியத் திருக்குறள் அருட்பாவால்

பூட்டிய வல்லவன் போனான் - காட்டிய

எல்லாம் சுத்த அறிவாகி ராமலிங்கமே

வல்லவன் என வாய்ந்தது.

வாய்மை மறைத்து வல்லானிட்டப் பூட்டை

தாய்மையால் உடைத்த தயாளன் - தூய்மை

எங்கும் தயவாகி ஓங்க ராமலிங்கமே

சங்கம் நடத்தி சார்ந்தான்.

சார்ந்ததின் பொருளான சுத்த சன்மார்க்கம் 

ஈர்த்தன எல்லாமினி ஓர்மார்க்கம் - பார்த்த

சாதியும் மதமும் சாய்ந்தன ராமலிங்கமே

வீதிதோறும் நிறைந்து விளங்கினான்.                 390

விளங்கிய விருப்பு வெறுப்பு எல்லாம்

களவாடி சத்துவமயம் கண்டேன் - களத்திரப்

பற்று தேகப் பற்றெல்லாம் ராமலிங்கமே

தொற்று நோயெனத் தெளிந்தேன்.

தெளிந்த நிலையில் தன்னை யறிந்து

வெளியும் கண்டு வியந்தேன் - துளியும்

அஞ்சேன் இனி என் ராமலிங்கமே

பஞ்சமகா பாவங்கள் போனதே.

போனதே ஆசாரவகை பற்றெலாம் சென்று

ஆனதே தலைவனின் அணுக்கம் - ஞான

தேக மதைத் தேடியே ராமலிங்கமே

வேகமாக நான் விரைந்தேன்.

விரைந்த தினாலன்று வந்தென் உயிரில்

கரைந்ததினால் கரை கண்டேன் - நரை

காணா உடலைக் காணவே ராமலிங்கமே

வாணாள் ஆகுமோ வீணாள்.

நாள் பதினைந்தாயிரம் நான் கண்டும்நின்

தாள் காணாது தவிக்கின்றேன் - தோளும்

ஆறடி ஆனது இன்னும் ராமலிங்கமே

கூறத்தான் என்னுளது குறித்து.

குறித்ததை அடையாது காலம் போகும்

அறிகுறி யன்றுஒன்று மறிகிலேன் - வறியவன்

பிழை தனையே பழியாக்கி ராமலிங்கமே

அழையாமல் விடுவதோ அறம்.

அறம் பயின்றே னாயினும் அதனைப்

புறம்காண நடக்கப் பழகிலேன் - திறமின்றி

சன்மார்க்கம் என்றே சொல்லி ராமலிங்கமே

துன்பமுற்று தினம் துயில்கின்றேன்.

துயில்வதையே தினம் துன்பமின்றி நான்

பயின்று சன்மார்க்கம் பழித்தேன் - குயிலாய்க்

கூவும் அருட்பாக் கேளாது ராமலிங்கமே

காவும் சினிப்பாடல் கேட்டேன்.

கேட்டதெலாம் கொடுத்துக் கெடுக்கும் தந்தையை

வீட்டளவில் கண்டு வளர்ந்தோம் - கூட்டளவில்

நான் கேட்பது நின்னையே ராமலிங்கமே

ஏன்உனைப் பெறவே ஏங்கினேன்.

ஏங்கியது ஏனெனில் ஏழ்பிறப்பும் அடி

வாங்கியே நான் வளர்ந்தேன் - ஓங்கிய

இனிய உன் அடியால் ராமலிங்கமே

கனிந்திருக்க கண்டேன் கனவு.                       400

(இராமலிங்க அந்தாதி - தொடரும்)