இராமலிங்க அந்தாதி - 3

அருட்பெருஞ்ஜோதி                அருட்பெருஞ்ஜோதி

தனிப்பெருங்கருணை               அருட்பெருஞ்ஜோதி

 எல்லா உயிர்களும் இன்புற்று வாழ்க  

https://drive.google.com/file/d/0B-1Hedu-YZTWclNGRktWTHNlRnc/view?usp=sharing

                          இராமலிங்க அந்தாதி          (05-07-2015)

(தி.ம.இராமலிங்கம்)

நேரிசை வெண்பா

வானலாவிய உறவாய் வருகின்ற அண்டங்களை

ஞானத்தால் நட்புறுவோம் ஞாயிறாய் - கானத்தால்

அவைகளைப் பாடி ஆளுகின்ற ராமலிங்கமே

சுவையாகி எனக்கு சுகமானான்.

சுகமான கீதங்களால் சன்மார்க்க மியற்றி

சகத்தில் நாம் சாகாதிருப்போம் - அகத்தில்

உலகெலாம் காண உலாவும் ராமலிங்கமே

பலமாய் இருப்பாயென் புறத்தும்.

புறமும் அகமும் புறப்புறத்தும் அகப்புறமும்

அறவொளி பிரகாசம் அருளினாய் - திறந்து

நான் பார்க்க நாணினேன் ராமலிங்கமே

ஏன் இன்பத்தை அளித்தாய்.

ஆன்மா ஜீவன் இந்திரியங்கள் கரணத்தில்

ஊன்றி பிண்டத்தில் ஒளிர்ந்தாய் - சான்றாய்

என் னகத்தே ஓங்கும் ராமலிங்கமே

உன் பிரகாசமே உண்மை.

சூரியன் அக்கினி சந்திரன் நட்சத்திரங்களில்

காரியப்பட்டு பிரகாசங் கொண்டாய் - வாரி

வழங்கு மண்டத்தில் வாழும் ராமலிங்கமே

பழக்குவாய் எனையும் பரத்தில்.

பரமாகாச மண்டத்திலும் பிண்டத் திலொரு

புருவ நடுவிலும் புகுந்தாய் - இருநிலை

அறிய அருட்பா அளித்த ராமலிங்கமே

சிறியேனின் நடு சித்தமோ.

சித்தம் அறியவே சத்தம் போட்டு

நித்தம் அழ நினைத்தேன் - பித்தன்

எனநீ நினைப்பாய் என ராமலிங்கமே

தினமும் சிரித்தேன் தனித்து.

தனித் தியங்க தெய்வத்தாலு மாகாது

மனிதன் முயல முடியுமோ - முனிவரும்

தேவரும் மூவரும் தேட ராமலிங்கமே

நீவரும் பாதை நின்றேன்.

நின்ற றியேன் நினைப்பு அறவேன்

கன்றாகினும் மடி அறியேன் - தன்நிலை

மறந் துனையே மதிக்க ராமலிங்கமே

இறந்தறியாத நிலையி லிடு.

இட்ட இடத்தி லிருந்து வளர்ந்து

துட்ட னாகித் தளர்ந்தேனே - சிட்டந்

தட்டி எனைத் தருவாய் ராமலிங்கமே

மட்டமாகி நான் மகிழவே.                          210

இட்ட இடத்தி லிருந்து வளர்ந்து

துட்ட னாகித் தளர்ந்தேனே - சிட்டந்

தட்டி எனைத் தருவாய் ராமலிங்கமே

மட்டமாகி நான் மகிழவே.

மகிழவே விந்துநாத முதலிய ஆதியைப்

பகிர்ந்து நிறைந்தப் புகழே - அகிலமதில்

மின்னல் இடி மயமான ராமலிங்கமே

இன்னல் தீர்க்க இரங்காய்.

இரக்க மனமானால் இறப்பு மறப்பாகும்

உரக்கச் சொன்னதை உரைத்தேன் - நரகத்தில்

இடர் படா இயல்பை ராமலிங்கமே

சுடர் மாலையாய்ச் சூட்டு.

சூடாக இவ்வுலகம் சுட்டாலும் தேவனைப்

பாடாத நாளில்லை பார்த்தாய் - வீடாக

நானிருக்கும் கூட்டை நாளை ராமலிங்கமே

வானிருக்கும் இடமாய் வாழ்த்து.

வாழ்த்தினால் வானமும் வந்திங்கு வணங்குமே

தாழ்த்தினால் தாயும்நாயென தூற்றுமே - ஊழ்வினை

எனை வாழ்த்துமோ அறியேன் ராமலிங்கமே

உனையே பிடித்தேன் அஞ்சேன்.

அஞ்சும் எட்டும் அஞ்சாமல் விட்டேன்

எஞ்சிய யாவும் ஏனோபோச்சு - பஞ்சு

மனதில் மார்க்கத்தீ மூட்ட ராமலிங்கமே

கனலாய் சூழ்ந்தான் காண்.

காணாதக் கனவில் கடவுள் வந்தாரென

வீணாகப் பாடியே வந்தேன் - வாணாள்

தந்து பொய்யைத் தயவாக்கி ராமலிங்கமே

வந்தான் மெய்யாய் எனக்கு.

எனக்கிது போதுமென இருக்க மாட்டேன்

உனக்குக் கொடுக்க உண்டேல் - எனக்கு

வாங்க முடியும் வாஎன் ராமலிங்கமே

ஓங்க வேண்டும் உன்னைவிட.

விடமாட்டேன் உனை விட்டுத் துயர்

படமாட்டேன் இப் புன்னுலகில் - நடமாடேன்

நாய்போல் என் நண்பா ராமலிங்கமே

பேய்யாய் சுற்றினேன் போகாதே.

போப்போ ச்சீபோப்போ புகழெனும் ஆணவக்

கூப்பாடே என்னிடம் கூடாதேபோப்போ - வாப்பா

எனைத் தாழ்த்தி உன்குடிலில் ராமலிங்கமே

மனையாய் இருக்க மடிசேர்.                   220

சேர்வாய் நெஞ்சே சன்மார்க்கஞ் சேர்ந்தால்

பேர் நிலைக்கும் பாராய் - ஊரெல்லாம்

நம் பேச்சுதான் நலமேவு ராமலிங்கமே

உம் மார்க்கம் உயர்ந்ததே.

உயர்ந்த உள்ளொளி அசைவின் நடனமதை

தயங்கிநான் கண்ட தருணம் - அயர்வெலாம்

போக்கி எனைப் புனிதனாக்க ராமலிங்கமே

தீக்குணம் நீக்கும் தெய்வம்.

தெய்வமிது தெய்வம் தேர்ந்தார் வணங்கும்

தெய்வமது அருட்ஜோதி தெய்வம் - மெய்யான

தெய்வமிது தூய தேகன் ராமலிங்கமே

தெய்வமெனப் பார்க்க தெய்வமாவீர்.

ஆவியில் கலக்கும் ஆற்ற லுடையாய்

காவியம் படைக்க கலந்தருளாயே - ஓவியம்

போலுன் அழகைப் பார்க்கவே ராமலிங்கமே

தோலுள் நரம்புகள் துடிக்குதே.

துடிக்கும் அணுக்களைத் திறந்தால் அங்கு

விடிந்திருக்கும் பல விண்வெளி - படிக்கும்

பாடமாய் உனைப் படிக்க ராமலிங்கமே

மாடம் தெரிந்தது முன்னே.

முன்னவனே முத்தேக மன்னவனே நின்

சன்னி தானத்திற்கே சரணம் - நன்றி

உரைத்தேன் என் உத்தம ராமலிங்கமே

கரைசேர்த்த உன் கருணைக்கு.

கருணை எத்தனை கிலோ கிடைக்குமென

தெரு வெல்லாம் தேடினேன் - மருதூரில்

கடை விரித்ததைக் கண்டேன் ராமலிங்கமே

எடைக்கு எடை என்னவிலையோ.

விலையறியாப் பொருளை வான் பொருளின்

கலையை சாகாதிருக்கக் கற்றேன் -  புலை

கொலை விட்டேகவே குரு ராமலிங்கமே

அலை கடலை அடக்கினான்.

அடக்கமும் அன்பும் அடங்கா இறைவனை

முடக்கும் உபாய மருந்தாகும் - சடங்கள்

எழுந்து வரும் எழுத்தாய் ராமலிங்கமே

முழுதும் மகா மந்திரமானான்.

மந்திரமோ மகாமந்திரம் முப்பத்து மூன்று

எந்திரம் ஓதும் அத்திறம் - தந்திரம்

அறிந்து தன்னை அறிந்த ராமலிங்கமே

அறியேன் என்னை அறியாயோ.                      230

அறிவாய் இரவிலே அமுதக் காற்றைக்

குறித்து நன்முயற்சிக் கடவாய் - அறிவு

விளக்கம் இரவில் விளங்க ராமலிங்கமே

உளத்தில் ஏனோ உறக்கம்.

உறக்கமே உணர்வாகி உணவே விருந்தாகி

மறந்தே இருந்தேன் மன்னவா - இறந்து

பிறக்கவே நன்கு பழகினேன் ராமலிங்கமே

அறஞ் சொன்னாலும் அண்டேன்.

அண்டமெலாம் அமுத அலையை இரவினில்

தெண்டத்திற்கு தருகின்றாய் தயவோ - பிண்டம்

அதனைப் பெறுவ தெப்படி ராமலிங்கமே

இதனை மாற்றி யமைப்பாய்.

அமைப்பை மாற்றி அமுதக்காற்றைப் பகலில்

சமைத்து சன்மார்க்கம் சாற்று - சுமையில்லா

இறை சட்டம் அருளாய் ராமலிங்கமே

குறை நான் கூறலாமா.

கூறுகின்ற மறைகளில் குறை என்றால்

மாறுகின்றான் உடன் மனிதன் - வீறுகொண்ட

பதிமீதே குறை புகன்றால் ராமலிங்கமே

விதியை மாற்ற வழியுண்டா.

வழியுண்டேல் வாரும் வானவீதியில் காலங்

கழித்துக் கடவுளைக் காண - விழித்திருக்க

முடியாது ஆனால் முத்திதர ராமலிங்கமே

பாடி வருவாய் பறந்து.

பறக்கும் என்னெஞ்சம் பசித்திருக்க அறியாது

பிறர் பசியும் புரியாது - உறவு

கொண்ட என் கணவா ராமலிங்கமே

உண்மை உரைத்தருள் உடனே.

உடன்வந்த கரும உடைமைகளை விரைந்து

கடந்து மேலேறவழி காட்டாய் - மடமை

நெஞ்சம் உடமை உறவே ராமலிங்கமே

எஞ்சியநான் உனக்கே அடிமை.

அடிமை என்றசொல்லுக் கடிமை அருட்ஜோதிக்

கடிமை ஆருயிர்க் கடிமை - படித்தப்

படிப்பிற்கு அடிமை பரஞான ராமலிங்கமே

நடிக்கும் நடத்திற்குஅடிமை நானே.

நானென்ற சொல்லில் நிறைந்தாய் நீயே

வான்பொருளாய் வந்தாய் நீயே - ஏன்

தான் மறையத் துணிந்தாய் ராமலிங்கமே

மானின் அழகு மறைப்பன்றோ.                      240              

என்றோ ஒருநாள் அவன்வரும் அழகினை

நன்றே பார்த்திட நானிருப்பேன் - அன்று

என்னோடு ஏதுபேச ஆசை ராமலிங்கமே

கன்றோடு பசுவாய்க் கூடிடுவோம்.

கூடு கலையுமோஎன் காடு அழியுமோ

பாடுபட்டப் பாடு பொய்க்குமோ - சூடு

கண்ட பூனை குடிக்குமோ ராமலிங்கமே

குண்டலிப் பால் காட்டேன்.

காட்டு விலங்கும் கூடி வாழுதே

நாட்டு மனிதா நாணமில்லை - கூட்டு

சாதிமத இனஞ் சார்ந்து ராமலிங்கமே

மோதி சாகவே முயலுவர்.

முயலாய் முடிந்தவரை மண்ணில் நாம்

தயவுடன் எல்லாம் தருவோம் - குயவு

மண்ணைச் சுட்டு மாளாவகை ராமலிங்கமே

கண் திறந்துக் காணாய்.

கண்ணின் ஒளியே கற்கண்டு சுவையே

விண்ணின் அமுதே வாராய் - எண்ணில்

எட்டு மிரண்டும் என்றாய் ராமலிங்கமே

எட்டாமல் போவது ஏனோ.

ஏனோ அறியேன்என் உயிரினில் கலந்ததனால்

தானோ வரமறுக்கின்றாய் தனியே - வானோ

காற்றோ எல்லாக் கூற்றும் ராமலிங்கமே

போற்றும் அரும் பொருளே.

பொருள்நிலைக் காணாது பொறுத்தேன் தலைவா

திருநிலை காட்டித் திருப்பு - இருந்த

வேலையும் விட்டு வந்தேன் ராமலிங்கமே

காலைப் பிடித்துக் கட்டேன்.

கட்டுங் கணக்கைக் காட்டி கால்

முட்டு மிடத்தை மணந்தாய் - விட்டுக்

கொடுக்கும் மனங் கொடு ராமலிங்கமே

ஒடுங்க வாராய் என்னுள்.

என்னையே கொடுத்தேன் எனதுயிர் உறவால்

உன்னையே எடுத்து உயர்ந்தேன் - நன்மையே

நவிலும் உன் நாவால் ராமலிங்கமே

கவிப்பல சொல்லக் குறித்தேன்.

தேனென இனிக்கும் திருவருட்பாக் கடலே

நானென இருக்கும் நாயகனே - ஈன்ற

வலி இனியும் விடுப்பனோ ராமலிங்கமே

பலி கொடுப்பதே பிறப்பு.                            250  

பிறக்க அழுதேனோ பிறந்து அழுதேனோ

இறக்க அழுதேனோ இங்கு - சிறக்க

உனை நினைத்து அழுதிலேன் ராமலிங்கமே

வினை தடுக்க விதிசெய்.

செய்த தவப்பலனாக சன்மார்க்கச் சாலை

எய்தி இறவாவரம் உற்றேன் - மெய்யே

எழுதினேன் பொய் எனில் ராமலிங்கமே

வழக்குப் போடுவேன் வந்து.

வந்து நான்செய்த வேலைகள் ஏதுமில்லை

நொந்து செல்லவோ நாயகா - வெந்து

கால் முட்டக் காணாது ராமலிங்கமே

பால் அருந்தப் பார்த்தேன்.

பார்க்கத் தெரியாது படித்தால் புரியாது

வார்த்தால் வராது வானம் - சார்ந்த

சன்மார்க்க சங்கத்தைச் சேர ராமலிங்கமே

தன்நிலை காட்ட தொடும்வானம்.

வானத்தில் சுற்றலாம் வாடாஎன் கண்ணே

ஞானமும் போதைதான் வாடாஎன் - கானமும்

பானமாகி உன்னைப் புகழ ராமலிங்கமே

போனப் பிறவிப்போல் போவேனோ.

போவேன் மேன்மேலும் பரமாகாச வானில்

ஈவேன் என் இன்னுயிரை - நோவேன்

இவ்வுலக வாழ்வு இசைய ராமலிங்கமே

அவ்வுலகம் காண்பது அறிவு.

அறிவுப் பெருங்கோவில் அகத்தில் காட்டி

குறிப்பால் நடுயிருந்த குருவே - பறித்த

பழமதை ருசி பார்க்க ராமலிங்கமே

அழகன் எனக்கு ஆசையே.

ஆசையெலாம் உன் அருட்பா ஓசையால்

மீசையும் போய் மாண்டதே - காசை

கூட்டும் பாவக் கணக்கை ராமலிங்கமே

பூட்டுப் போட்டு பூட்டுமே.

பூட்டைத் திறந்துப் பார்க்க எனக்குமோர்

வீட்டைக் கொடுத்த வள்ளலே - காட்டைக்

கடந்து செல்லக் காவலாய் ராமலிங்கமே

நடந்து வருவாய் நாளுமே.

நாளும் முப்பத்துமூன்றை நாவினால் ஓத

வாளறுந்து போகும் வினை - கோளும்

அதில் வாழும் உயிரும் ராமலிங்கமே

கதிபெற்று உயரக் காப்பாய்.                         260

காப்பாய் நீயென கடலில் விழுந்து

கூப்பாடு போட்டு கலங்கினேன் - சாப்பாடு

போட்டு கரைசேர்ப் பித்த ராமலிங்கமே

காட்டு உனது கதிர்நலத்தை.

நலமோங்கு மந்திரம் நானறிந்து என்

குலதெய்வம் நீஎனக் கண்டேன் - மலமொத்த

வாழ்வில் எனை வீழ்த்தாது ராமலிங்கமே

ஏழ்பிறப்பும் எனை ஏந்தினாய்.

ஏந்தியக் கரங்கள் எதிர்வர உன்னிரு

காந்தியக் கண்களைக் காணேணோ - சாந்தி

எங்கும் நிலவ எண்ணில் ராமலிங்கமே

தங்கள் தயவைத் தாரும்.

தருகின்ற அமுதத்தை தலை வணங்கிப்

பருகநானும் சன்மார்க்க பொருளானேன் - உருகி

உனைப் பாடவே உயர்ந்தேன் ராமலிங்கமே

எனையும் சமமாக்க எண்ணு.

எண்ணுந் தோறும் என்னிதயம் துள்ளி

கண்ணில் நீர் காணுதே - பண்ணில்

கலந்து எழுதி காட்டும் ராமலிங்கமே

தலமோங்கப் பாடுவாய் தழைத்து.

தழைத்த சன்மார்க்கம் துலங்கி பெருவாழ்வு

இழைத்திட இணங்கி அருளாய் - பிழை

எல்லாம் பொறுத்து ஏற்பாய் ராமலிங்கமே

கல்லான் பிழையும் கணக்கோ.

கணக்கில்லா அண்டங்களை கடந்து சுகம்

உணரும் நாள்தான் எந்நாளோ - குணங்கள்

ஒழிந்து துரிய மாவதை ராமலிங்கமே

குழியில் விழும்முன் கூட்டு.

கூட்டு சதியால் குலைக்கும் பொறிகளை

ஓட்டும் நாள்தான் எந்நாளோ - வாட்டும்

மன்மத லீலையை மறக்க ராமலிங்கமே

உன்பாத நிழலில் உறைந்தேன்.

உறைந்தப் பனி உருகுவதுபோல் உயிருருகி

இறைவனாகும் நாள்தான் எந்நாளோ - மறைத்த

திரைகளை தயவால் தள்ளும்முன் ராமலிங்கமே

நரைதிறை மூப்பை நாட்டாதே.

நாட்டுகின்ற மதமெலாம் நன்மார்க்கப் பொது

ஆட்ட மாடும்நாள்தான் எந்நாளோ - சூட்டும்

அந்தாதிப் பாடலை அலங்கரிக்க ராமலிங்கமே

வந்து பொதுவாக்கி விடுத்தான்.                      270

விடுதலை வேண்டி விண்ணப்பித்து விண்ணில்

ஒடுங்கும் நாள்தான் எந்நாளோ - படுகுழி

பாவையின் கண் படுமோ ராமலிங்கமே

சாவை விரும்புமோ சன்மார்க்கம்.

சன்மார்க்க சமரச சத்திய சுத்தமானது

என்னளவில் வருநாள் எந்நாளோ - என்று

தினந் தினம் துவல்கிறேன் ராமலிங்கமே

மனம் உருகும் மந்திரந்தா.

மந்திரஞ் சொல்லி மனமடக்கி நான்

எந்திர மாகும்நாள் எந்நாளோ - தந்திரஞ்

சொல்லி நாதமுடி சந்திரனாக ராமலிங்கமே

பல்லி நன்னிமித்தம் புகலாய்.

புகன்ற வள்ளுவன் புகழ்குறள்படி சாகா

உகம் காணும்நாள் எந்நாளோ - இகபர

வாழ்வில் இரக்கம் வர ராமலிங்கமே

ஊழ்வினை உறுத்து ஊட்டுமோ.

ஊட்டும் உணவினை உவட்டாது உண்ண

ஆட்டுவிக்க ஆடும்நாள் எந்நாளோ - ஏட்டுக்

கல்வியும் இங்கு கறியாக ராமலிங்கமே

பல்லவி பாடுவாய்ப் புகழ்ந்து.

புகழ்ந்து நானுரைக்கும் பாட்டெல்லாம் நீவந்து

அகழ்ந்து ஆளும்நாள் எந்நாளோ - தகன்ற

நெஞ் சகத்தை நெகிழ்விக்க ராமலிங்கமே

அஞ்சுவது தான் அழகோ.

அழகைப் பார்க்காது அகத்தைப் பார்த்து

அழுகின்ற நாள்தான் எந்நாளோ - கழுகேற்றி

மதம் மாற்றிய மடையனை ராமலிங்கமே

நிதம் புகழ்வது நியாயமோ.

நியாயஞ் சொல்லும் நித்திய ஒழுக்கத்தை

ஓயாமல் பிடிக்கும்நாள் எந்நாளோ - மாயா

உலகப் பற்றை உடைக்க ராமலிங்கமே

பலங் கொடுப்பாய் பாமரனுக்கு.

பாமரனும் ஞானியாகி பைந்தமிழில் பாடியே

ஏமம் செய்யும்நாள் எந்நாளோ - காமமுன்

நாமம் சொல்ல நெடுமே ராமலிங்கமே

தாமதம் ஏனோ தயவருள.

அருளும் திரையோதச அலையில் மூழ்கி

உருளும் நாள்தான் எந்நாளோ - குருவும்

இறையும் நீஎன இருந்தேன் ராமலிங்கமே

மறைராகத் திரைநீக்கி மீட்டாய்.                      280

மீட்டுமின்ப ராகத்தில் மரணமிலா ராகத்தை

ஈட்டும் நாள்தான் எந்நாளோ - கேட்டும்

இல்லை எனில் அந்தோ ராமலிங்கமே

எல்லை கடந்து ஏறுவேன்.

ஏறுகின்ற வழியெலாம் ஏகாந்தனைப் பார்த்து

ஊறுகின்ற நாள்தான் எந்நாளோ - மாறுகின்ற

உலக மாயை அறுத்து ராமலிங்கமே

கலகமில்லா நடம் காட்டு.

காட்டா தொழிக்கவே கர்வந் தன்னை

ஓட்டும் நாள்தான் எந்நாளோ - மாட்டி

விட்ட தேகம் வாடாது ராமலிங்கமே

துட்ட வாசனை துடைப்பாய்.

துடைக்கும் துயரெலாம் துடைத்து சன்மார்க்க

மடையும் நாள்தான் எந்நாளோ - தடை

ஏது கண்டாய் என் ராமலிங்கமே

சூது செய்யாது சூழ்வாய்.

சூழும் உலகிடை சூழ்ச்சிவிட்டு என்னில்

ஆழும் நாள்தான் எந்நாளோ - வீழும்

உடலிடை நீ இருக்க ராமலிங்கமே

சடமென வீழேன் சத்தியம்.

சத்திய ஞானசபை சுயத்தில் கண்டுஅதில்

அத்தை காணும்நாள் எந்நாளோ - வித்தை

புரியும் விவரம் புகன்று ராமலிங்கமே

உரித்தாகுக உரிய இன்பத்தை.

இன்பம் துன்பம் இரண்டுமின்றி சன்மார்க்க

அன்பராகும் நாள்தான் எந்நாளோ - தன்னொளி

தான் பார்க்கத் தடையோ ராமலிங்கமே

வான் ஒளியாய் வழங்கு.

வழங்கும் முத்தேக வித்தைப் பெற்று

உழலும் நாள்தான் எந்நாளோ - விழலும்

நீர் பெற்று நீளுமே ராமலிங்கமே

சீர்த்தர எனக்கு சிரமமோ.

சிரமமின்றி நாளும் சீவ காருண்ய

இரக்கம் காணும்நாள் எந்நாளோ - நரகில்

இடர் படோம் என்றும் ராமலிங்கமே

விடம் கொடுத்தாலும் வரமே.

வரம் வாங்கிவந்து விளங்கி ஓங்கும்

சிரம் காணும்நாள் எந்நாளோ - கரம்

பிடித்து நாடி பார்த்த ராமலிங்கமே

விடிந்ததே என் வானம்.                            290

வானம் வசப்பட்டு வானறிவும் பெற்று

ஊனம் நீங்கும்நாள் எந்நாளோ - தானம்

அளிக்கும் திற னளித்து ராமலிங்கமே

களிம்பை நீக்கி கனகமாக்கு.

கனலை உணர்ந்து கனகமாகி உன்அக

இனமாகும் நாள்தான் எந்நாளோ - மனம்

வாட்ட மடைய வள்ளல் ராமலிங்கமே

காட்டுவேன் பல காரணம்.

காரணப்பட்டு காணும் கந்தசாமி போல

ஆரணங் கடக்கும்நாள் எந்நாளோ - பூரண

சுத்தசிவ நோக்கம் சார்ந்து ராமலிங்கமே

புத்தகங்கள் கணத்தில் படிப்பேனோ.

படிப்பறியா பாவியேன் படுந்துன்ப மறந்துன்

அடிக்காணும் நாள்தான் எந்நாளோ - முடிவற்ற

வாழ்வாம் பெரு வாழ்வை ராமலிங்கமே

பாழ் படாது பயிற்று.

பயிலும் பாடத்தில் பிரணவங் கற்றுஎன்

உயிரை காணும்நாள் எந்நாளோ - வயிற்றுப்

பசி நீங்கியேப் போக ராமலிங்கமே

புசிக்க முப்பூப் பொருளைத்தா.

பொருளெல்லாம் அருளாய் பார்க்கும் உன்திரு

வருட்பா இயற்றும்நாள் எந்நாளோ - ஒருமந்திரம்

இயற்றி உனை இசைப்பேன் ராமலிங்கமே

பயம் பூஜ்ஜியமாகிப் போனதே.

போவென்று சொன்னாலும் போகாத பாவத்தால்

ஓவென்று அழும்நாள் எந்நாளோ - வாவென்று

என்று சொல்லி அனுப்பிய ராமலிங்கமே

வென்றேன் அங்கு வரட்டுமா.

வரம் எனப்படும் வள்ளலின் அருளை

கர மேந்தும்நாள் எந்நாளோ - சர

ஓட்டங் கண் டாட ராமலிங்கமே

பாட்டுக்குத் தாளம் போடுவாய்.

வாயெல்லாம் இனிக்க வானவனைப் பாடி

ஆய்ந் திருக்கும்நாள் எந்நாளோ - ஓய்ந்திருக்க

ஆகுமோ என் அய்யா ராமலிங்கமே

சாகுமோ எனது சங்கம்.

சங்கத்தில் இருந்தே சாதுவாகி சாகாத

அங்கமாகும் நாள்தான் எந்நாளோ - தங்கம்

செய்யு மாற்றல் சனித்தும் ராமலிங்கமே

அய்யோ அதனை அண்டேனே.                      300

(இராமலிங்க அந்தாதி - தொடரும்)