“இஸ்லாம்” - கழிப்பறை ஒழுக்கங்கள்

காரணப்பட்டு ச.மு.க. அருள் நிலையம் வழங்கும் “சன்மார்க்க விவேக விருத்தி” என்னும் இணைய இதழில் ‘மே-2017’ அன்று “இஸ்லாம்” என்ற தலைப்பில் வெளியானவை…

கழிப்பறை ஒழுக்கங்கள்

இஸ்லாம் கூறும் கழிப்பறை ஒழுக்கங்களை பற்றி பார்ப்போம்…

1. கழிவறையில் நுழையும்போது முதலில் இடது காலை வைத்து நுழைய வேண்டும். கழிவறையில் இரு பாதங்கள் வைக்குமிடத்தில் முதலில் வலது காலை வைத்து உட்கார வேண்டும். எழுந்திருக்கும்போது இடது காலை எடுத்து வைத்து வர வேண்டும்.

2. முடிந்தவரை குனிந்து ஆடைகளை திறக்க வேண்டும்.

3. இறைவசனம் அல்லது நபி அவர்களின் திருநாமம் கண்ணுக்குத் தென்படுகின்ற அளவு எழுதப்பட்டுள்ள மோதிரம் போன்ற பொருட்களை கழிவறையில் நுழையும் முன்பு களைந்துவிட்டுச் செல்ல வேண்டும்.

4. கழிவறையில் கிப்லாவை முன்னோக்கவும் கூடாது. பின்னோக்கவும் கூடாது. (கிப்லா-காஃபா இருக்கும் திசை)

5. மலஜலம் கழிக்கும்போது அந்தரங்க உறுப்பை வலது கையால் தொடாமல் இருக்க வேண்டும்.

6. மலஜலத் துளிகள் உடலில் படாது பார்த்துக்கொள்ள வேண்டும்.

7. கழிவறை இல்லாத இடங்களில் காடு, கரைகளுக்குச் செல்லும்போது பிறர் பார்வை படாது பார்த்துக்கொள்ள வேண்டும்.

8. சிறுநீர் கழித்தால் சுத்தம் செய்யுங்கள்.

9. சிறுநீர் கழிப்பதற்காகச் செல்லும்போது சிறுநீர்த்துளிகள் தெறிக்காத, நீர்களை உறிஞ்சி விடும்படியான மண்பகுதியினைத் தேடிச் செல்ல வேண்டும்.

10. சிறுநீர், மலம் கழிக்கும்போது பேசக்கூடாது. அதனால் அல்லாஹ் கோபப்படுகின்றான்.

11. பொது இடங்களில், நடைபாதைகளில், நிழல் தரும் மரத்தடியில் அசுத்தம் செய்யக்கூடாது.

12. வலது கரத்தைக்கொண்டு பிறவி உறுப்பைத் தொடக்கூடாது.

13. தகுந்த காரணமின்றி நின்று கொண்டு சிறுநீர் கழிக்கக்கூடாது.