தேர்வில் வெற்றி நமதே

காரணப்பட்டு ச.மு.க. அருள் நிலையம் வழங்கும் “சன்மார்க்க விவேக விருத்தி” என்னும் மின்னூலில் மார்ச்-2017 ஆம் மாதம் வெளிவந்தவை:

தேர்வில் வெற்றி நமதே

தமிழக பள்ளி மாணவர்களுக்கு இறுதி தேர்வுகள் நடைபெறும் காலம் இது. அனைத்து வகுப்பு மாணவர்களும் நன்கு படித்திருப்பீர்கள். நீங்கள் படித்ததை நிரூபிக்கும் இடம் தேர்வுக்கூடமாகும். படித்தல் நல்ல முறையில் இருந்திருந்தால் தேர்வு எழுதுதலும் நல்ல முறையில் அமையும். அந்த வகையில் படித்தல் முறை பற்றி சில குறிப்புகள் உங்களுக்காக. படித்தல் என்பது மூன்று வகையான செயல்களை உள்ளடக்கியது,

1) கூர்ந்து கவனித்தல் (Observation)

2)தொடர்பு படுத்துதல் (Correlation)

3) செயல்படுத்தல் (Application)

கூர்ந்து கவனித்தல்:

கூர்ந்து கவனித்தல் என்பது நாம் ஒரு புத்தகத்தைப் படிக்கும்போது அது எதைப்பற்றிக் கூறுகிறது. எவ்வாறு கூறுகிறது என்பதைக் கவனத்துடன் படிப்பதாகும்.

தொடர்பு படுத்துதல்:

அவ்வாறு நாம் கூர்ந்து கவனிக்கும் புது விஷயங்களை ஏற்கெனவே நமக்கு நன்கு தெரிந்த ஒரு சிலவற்றோடு தொடர்பு ஏற்படுத்திக் கொள்ள வேண்டும். இது நம் நினைவிலிருக்க உதவுகிறது.

செயல்படுத்தல்:

நாம் புதிதாகக் கற்றவற்றைத் தகுந்த சூழ்நிலைகள் வரும்போது பயன்படுத்த வேண்டும். உதாரணமாக, நாம் புதிதாக ஒரு செய்யுளைக் கற்றோமென்றால், அதுபோன்ற நமக்குத் தெரிந்த பாடலுடன் தொடர்பு செய்து கொள்வதோடு மட்டுமல்லாமல், பேச்சுப் போட்டி, கடிதங்கள் போன்றவற்றில் நாம் கற்ற அந்த செய்யுள்பாடலைப் பயன்படுத்த வேண்டும். இது கற்றதை மறந்துவிடாமல் இருக்க உதவுகிறது.

கற்றல் செயற்பாங்கு: (Learning Process)

கவனத்தோடு கேட்பது அல்லது படிப்பது: என்ன பாடம் - அதிலிருந்து என்ன எதிர்பார்க்கலாம் என்பது தெளிவாகத் தெரிந்தால் மிக எளிதாகக் கல்வி கற்கலாம்.

குறிப்பு எடுக்க வேண்டும்:

ஆசிரியர் பாடங்களைக் கற்றுத்தரும்போதும், படிக்கும்போதும் குறிப்பு எடுக்க வேண்டும். குறிப்பெடுத்த பின் என்ன கற்றோம் என்பதை நினைவுப்படுத்திப் பார்க்க வேண்டும்.

புதிதாகக் கற்றவற்றை அடிக்கடி சொந்த வார்த்தைகளில் சொல்லிப் பார்க்க வேண்டும். புதிதாகக் கற்றவற்றைத் தகுந்த சூழ்நிலைகள் கிடைக்கும்போதெல்லாம் நடைமுறைப்படுத்தல் அல்லது செயல்படுத்தல் வேண்டும்.

எவ்வாறு படிப்பது?:

தலைப்புகளைப் படித்துப் புரிந்துகொண்டு அதனைக் கேள்வியாக மாற்றுவதன் மூலம் நாம் என்ன படிக்கப் போகிறோம் என்பது நமக்கு நன்கு புரியும்.

முக்கியத் தலைப்புக்குக் கீழ் உள்ள சிறிய தலைப்புகளையும், எடுத்துக்காட்டுகளையும் வரைபடங்களையும் ஆராய்ந்து அறிவதன் மூலம் நாம் படிக்கும் புத்தகம், பாடம் நமக்குக் கூறும் முக்கியக் கருத்து என்ன என்பது தெரியும்.

ஒவ்வொரு தலைப்புக்குக் கீழ் உள்ள முதல் பத்தியும், பாடத்தின் பின்பகுதியில் உள்ள சுருக்கமான தொகுப்புகளும் மற்றும் வினாக்களை நன்கு படித்துப் பார்க்க வேண்டும். இவ்வாறு செய்தபின், நீங்கள் என்ன கற்றுக் கொண்டீர்கள் என்பதை நினைவுப்படுத்திப் பார்க்க வேண்டும். ஒரு தாளில் நீங்கள் தெரிந்து கொண்ட அனைத்தையும் எழுதிப் பார்க்க வேண்டும்.

அதனைச் சரிபார்த்து, மேலும் என்ன தெரிய வேண்டும் என்பதைப் புரிந்துகொண்டு மீண்டும் படித்தால் அப் பாடத்தை எளிதாய் நம் மனத்தில் நிறுத்த முடியும். ஒரு பாடத்தைப் படிக்கத் தொடங்கும் முன் எந்த முறையில் படிப்பது என்பது மிக அவசியம். புத்தகத்தை எடுத்தவுடன் முதல் பத்தியில் இருந்து மனப்பாடம் செய்ய ஆரம்பித்து விடக்கூடாது. கீழ்க்கண்ட முறையைப் பின்பற்றிப் படிக்க ஆரம்பித்தால் மிக எளிதாகக் குறுகிய நேரத்தில் மனத்தில் நிலைநிறுத்திக் கொள்ளலாம்.

படிக்கப் போகும் பாடம் முழுவதையும் மேலோட்டமாக வாசிக்க வேண்டும். தலைப்புகளுக்கும், துணைத் தலைப்புகளுக்கு முக்கியத்துவம் கொடுக்க வேண்டும். இதனால் இப்பாடம் எதைப் பற்றியது என்பது விளங்கும். பாடச் சுருக்கத்தை நன்றாகப் படிக்க வேண்டும்.

இதிலுள்ள சில வார்த்தைகளைப் படிக்கும்போது மனத்தில் கேள்விகள் எழும். (எடுத்துக்காட்டு : உயிரியலில் சைட்டோபிளாசம் என்ற சொல்லை வாசிக்கும்போது சைட்டோபிளாசம் என்றால் என்ன என்பதைத் தெரிந்து கொள்ளும் ஆர்வம் வரும்.)

வினா எழுப்புதல்: (Asking Questions)

பாடச்சுருக்கத்தை வாசித்த பிறகு, பாடத்திலுள்ள தலைப்புகள் அனைத்தையும் கேள்விகளாக மாற்றி நமக்குள் கேட்டுக் கொள்ள வேண்டும்.

இவ்வாறு செய்வதால் அதைத் தெரிந்து கொள்வதற்கான ஆர்வம் அதிகரிக்கும்.

எதற்காக இதைப் படிக்கிறேன். அதன் பயன் என்ன? என்பதை அறிந்து கொள்வதற்கான ஆர்வம் அதிகரிக்கும். (எடுத்துக்காட்டு) அறிவியலில் மின்னாற் பகுப்பு என்ற தலைப்பை வாசிக்கும்போது மின்னாற் பகுப்பு என்றால் என்ன? என்ற கேள்வியை மனத்தில் எழுப்ப வேண்டும்.)

வாசித்தல் (Read):

அர்த்தம் புரியும்படி கவனமாக வாசிக்க வேண்டும்.

படித்தவற்றை நமக்கு ஏற்கெனவே தெரிந்தவற்றோடு தொடர்புப்படுத்தி எடுத்துக்காட்டோடு படிக்க வேண்டும்.

புத்தகத்தில் அதிகமாக அடிக்கோடிடுவதைத் தவிர்க்க வேண்டும்.மிகவும் முக்கியமான வார்த்தைகளை மட்டும் அடிக்கோடிட வேண்டும்.

இதனால் திரும்பிப் பார்க்கும் போது குழப்பமில்லாமல் எளிதாகப் பாடத்தை நினைவிற்கு கொண்டு வர முடியும்.

திரும்பச் சொல்லிப் பார்த்தல்: வாசித்து முடித்தபிறகு, முக்கியமானவற்றை நினைவுக்குக் கொண்டு வந்து சொல்லிப் பார்க்க வேண்டும்.

இம்முறையானது படித்தவற்றை நினைவில் நிறுத்திக் கொள்ள மிகச் சிறந்த வழியாகும். படித்தவற்றை சொந்த வார்த்தைகளில் சத்தமாகச் சொல்லிப் பார்க்க வேண்டும்.

மேற்கண்ட முறைகளைப் பின்பற்றி ஒரு பிரிவை முடித்தவுடன் அடுத்த பிரிவிற்குச் செல்ல வேண்டும்.

தேர்வு எழுதிப் பார்த்தல்: இந்த முறைகளில் பாடம் முழுவதையும் படித்து முடித்த பிறகு மாதிரித் தேர்வு எழுதிப்பார்க்க வேண்டும்.

ஒரு முறை முதலிலிருந்து அனைத்தையும் திரும்பிப் பார்க்க வேண்டும். தலைப்பும் எவ்வாறு மற்றவற்றுடன் தொடர்புபடுத்தப்பட்டுள்ளது என்பதைப் புரிந்து கொள்ள வேண்டும். கடைசியாக பாடச்சுருக்கத்தை இன்னொரு முறை வாசிக்க வேண்டும்.

        அனைத்து மாணவ மாணவிகளும் தேர்வில் வெற்றி பெற்று வாழ்வில் முன்னேற “சன்மார்க்க விவேக விருத்தி” வாழ்த்துகின்றது.

மீத்தேன் தேடும் தேனீக்கள்

காரணப்பட்டு ச.மு.க. அருள் நிலையம் வழங்கும் “சன்மார்க்க விவேக விருத்தி” என்னும் மின்னூலில் மார்ச்-2017 ஆம் மாதம் வெளிவந்தவை:

மீத்தேன் தேடும் தேனீக்கள்

சென்ற மாதம் ஜல்லிக்கட்டுக்காக போராட்டம் நடந்து முடிந்து தமிழகம் வேறு போராட்டத்தை நோக்கி சென்றுகொண்டிருந்தது. மாடு பிடிக்கும் போட்டியுடன் ஆட்சி பிடிக்கும் போட்டியும் நடைபெற்று அதில் திரு. எடப்பாடி பழனிச்சாமி அவர்கள் முதலமைச்சர் பதவியை பிடித்தார். அ.தி.மு.க.வின் நியமன பொதுச்செயலாளர் திருமதி.சசிக்கலா அவர்களை குற்றவாளி என உச்ச நீதிமன்றம் தீர்ப்பு உறுதிபடுத்தப்பட்டதால், அவர் பெங்களூரு சிறையில் அடைக்கப்பட்டார். நம்பிக்கை வாக்கெடுப்பில் பல்வேறு போராட்டத்திற்கு பிறகு எடப்பாடி K.பழனிச்சாமியின் அரசு வெற்றிபெற்றது.

                       

                                                             

தமிழகத்தில் ஒரு அரசு ஏற்படவே பல்வேறு போராட்டங்களை அரசியல் கட்சிகள் பங்கேற்க வேண்டிய நிலமையில், ஒரு பக்கம் அத்திக்கடவு அவிநாசி திட்டத்திற்காக மக்கள் போராட்டம் நடந்துக்கொண்டிருந்தது. (நல்லவேலை நியூட்ரினோ திட்டத்தை மக்கள் மறந்துவிட்டனர்) அந்தப் போராட்டத்தை மிஞ்சும் அளவிற்கு நெடுவாசல் போராட்டம் தீபற்றிக்கொண்டது. தீபற்ற காரணம் எரிவாயு திட்டமாகும். மீத்தேன் என்பது எரிவாயு ஆகும். மாட்டு சாணத்தில் இருந்து கிடைக்கும் எரிவாயுகூட மீத்தேன்தான். இப்படிப்பட்ட மீத்தேன் வாயுவானது இந்திய நிலப்பரப்பில் ஆங்காங்கே பூமியின் அடியில் பாறைப் பரப்பில் காணப்படுகின்றது. இந்த மீத்தேன் வாயுவை எடுத்து மின்சாரம் தயாரிக்கவும் எரிபொருளுக்காகவும் இந்தியா பயன்படுத்தத் தொடங்கினால், நாம் வெளிநாட்டிலிருந்து இறக்குமதி செய்யும் எரிவாயு மற்றும் நிலக்கரிச் செலவினை குறைக்கலாம் என்பது மத்திய அரசின் நோக்கமாக இருக்கின்றது. இதனால் இந்தியாவில் தமிழ்நாடு, குஜராத் உட்பட இன்னும் சில மாநிலங்களில் இந்த மீத்தேன் எடுக்கும் திட்டத்தை இந்தியா செயல்படுத்துகின்றது.

        அதற்காக ஹரியானா மாநிலத்தில் உள்ள கிரேட் ஈஸ்டர்ன் எனர்ஜி கார்ப்பரேசன் லிமிடெட் (Great eastern energy corporation Ltd.,)  என்ற நிறுவனத்திற்கு 100 ஆண்டுகளுக்கு மீத்தேன் எடுக்கும் உரிமையினை மத்திய அரசு அளித்துள்ளது.

       

        தமிழகத்தில் காவிரி டெல்டா பகுதியில் உள்ள 50 லட்சம் விவசாயிகளை துரத்திவிட்டு, பாகூரிலிருந்து ராஜமன்னார்குடி வரை உள்ள 1,64,819 ஏக்கர் நிலப்பரப்பில் இயங்கக்கூடிய திட்டம் இது. இத்திட்டம் அமல்படுத்தப்பட்டால் விவசாய நிலங்கள் எல்லாம் பாலைவனமாக போய்விடும் என்பதைவிட காணாமல் போய்விடும். எப்படி என்றால் இவர்களது நூறாண்டுத் திட்டத்தில் 35 ஆண்டுகளில் அந்நிலப்பரப்பிற்கு கீழ் உள்ள மீத்தேன் வாயுவினை உறிஞ்சி எடுத்துவிடுவர். அதற்கு முன்னதாக நிலத்தடி நீர் முழுதும் வெளியேற்றிவிடுவர். அடுத்த 65 ஆண்டுகளில் அவர்கள் செய்ய இருப்பதுதான் உண்மையான மறைக்கப்பட்ட திட்டம். அதுதான் அந்நிலத்தில் உள்ள நிலக்கரியினை வெட்டி எடுப்பது. உண்மையில் இது நிலக்கரி எடுக்கும் திட்டம்தான்.

        தற்போதுள்ள நெய்வேலி நகரை நினைத்துப்பாருங்கள். அவையெல்லாம் அற்புதமான விவசாய நிலங்கள் ஆகும். பணப்பயிர்கள் விளையக்கூடிய நிலங்கள். உலகிலேயே கிடைப்பதற்கு அரிதான செம்மண் பூமிகள். அந்நிலங்கள் எல்லாம் தற்போது நிலக்கரி எடுக்கின்றோம் என்று பள்ளம் தோண்டி பெரும் பள்ளத்தாக்குகளாக உள்ளன. மேலும் மேலும் நெய்வேலியினைச் சுற்றியுள்ள ஊர்கள் எல்லாம் தற்போது காணாமல் போய்க்கொண்டே இருக்கின்றது. இன்று நாம் விழிப்புணர்வு பெற்று போராட்டம் செய்வது போல அன்றைய மக்கள் செய்திருந்தால் நெய்வேலி பசுமை நிறைந்த காடாக இன்று இருந்திருக்கும். பல்வேறுபட்ட உயிரினங்கள் மனிதர்களுடன் கூடி உலாவிக்கொண்டிருக்கும். பல்வேறுபட்ட மரங்கள் பசுமையுடன் கிளைத்து செழித்திருக்கும். மனிதர்களுத் தேவையான மழையும், ஆக்சிஜனும் இன்னும் கூடுதலாக கிடைத்திருக்கும். அந்த மண்ணின் மைந்தர் வள்ளற்பிரான் அன்றைக்கே அம்மக்களுக்கு, “இந்த இடம் ஒரு காலத்தில் பொன்னாலும் வைரத்தாலும் ஜொலிக்கும், எனவே இவ்விடத்தை யாருக்கும் விற்றுவிட்டு வெளியேறிவிடாதீர்கள்” என்று வாய்மொழி உத்தரவிட்டார். வள்ளலார் சொன்னதை யாரும் கேட்கவில்லை. வள்ளலார் அங்கே ஞானசபையினை நிறுவியதால் அதனைச் சுற்றியுள்ள இடங்கள் காப்பாற்றப்பட்டுள்ளன. இல்லையெனில் இன்றைய வடலூர் என்றோ பாதாள பூமியாகியிருக்கும்.

        சமீபத்தில் ஒரு கணக்கெடுப்பு நடத்தப்பட்டது. அதன்படி நிலக்கரியால் இயங்கும் அனல்மின் நிலையங்களால் காற்று அசுத்தமடைந்து, அதனால் தினமும் நிமிடத்திற்கு 5 நபர்கள் இறந்துவிடுவதாக புள்ளிவிவரங்கள் தெரியப்படுத்தப்படுகின்றன.

        இவ்வளவு ஆபத்தினை நாம் இப்பூமியை குடைந்து வரவழைக்கத்தான் வேண்டுமா? இயற்கையான விவசாய நிலங்களை காப்பாற்ற போராடுவோம். இந்தியா ஒரு விவசாய நாடு என்பதை நிரூபிப்போம். 1,64,819 ஏக்கர் நிலப்பரப்பில் விளையும் நெல், உளுந்து, எள், பாசிப்பயிறு, கடலை, கரும்பு, வாழை, கம்பு, சோளம் மற்றும் விவசாயம் சார்ந்த இதர தொழில்களையும் கணக்கிட்டால் 35 ஆண்டுகளில் 35 லட்சம் கோடி மதிப்புக்கு விவசாய வியாபாரம் நடைபெறும் என கணக்கிட்டுள்ளனர். ஆனால் 35 ஆண்டுகளில் மீத்தேன் எடுப்பதால் அந்நிறுவனத்துக்கு வெறும் 6.25 லட்சம் கோடிதான் வருவாய் கிட்டும். எனவே பொருளாதார ரீதியாகப் பார்த்தாலும் மீத்தேன் எடுப்பது இலாபநோக்கற்ற திட்டமாகவே உள்ளது.

        அந்தந்த பகுதி விவசாயிகள் எல்லாம் ஒருங்கிணைந்து விவசாயத்தை கூட்டுறவு விவசாயமாக செய்ய வேண்டும். நிலத்தின் பத்திரஙகள் மட்டும் தனித்தனியாக இருப்பதில் தவறில்லை. இப்படித் தனித்தனி உரிமை நிலங்களை ஒன்றிணைத்து 500 ஏக்கர் நிலப்பரப்பிற்கு ஒரு கூட்டுறவு விவசாய சங்கம் தோற்றுவித்து அந்நிலங்களில் எல்லாம் பழைய வரப்புகளை நீக்கப்பட்டு, வசதிக்கு ஏற்ப வரப்புகளை புதியதாக தோற்றுவித்து விவசாய சங்கம் மூலம் அங்கு விவசாயம் மேற்கொண்டால், உற்பத்தி செலவுகள் குறையும். வேலை வாய்ப்புகளும், வேலை செய்வோருக்கு மாதாந்திர ஊதியமும், நிரந்தர விவசாயிக்கு ஓய்வூதியமும், காப்பீடுகளும் கிடைக்க இந்த விவசாய கூட்டுறவு சங்கத்தால் முடியும். மேலும் விளைபொருட்களுக்கு ஏற்ற விலையினை சங்கமே முடிவு செய்யும் சூழலும் பிறக்கும். இவ்வாறு சிறு சிறு நிலங்கள் எல்லாம் கூட்டுறவு என்ற நோக்கில் பெரும் நிலங்களாக ஆக்கிவிட்டால், தனியார் ரியல் எஸ்டேட் முதற்கொண்டு மத்திய மாநில அரசுகளும் அங்கே மூக்கை நுழைக்க முடியாது என்பது எமது கருத்து.  

        எப்படிப்பார்த்தாலும் இந்த தமிழ்நாட்டில் மட்டுமல்ல இந்தியாவில் வேறு எங்கும் இன்னொரு நெய்வேலியினை உருவாக்க நாம் அனுமதி அளித்துவிடக்கூடாது என்பதில் உறுதியாக இருப்போம். வாழ்க விவசாயம்… வாழ்க விவசாயி… வாழ்க உலகம்… வாழ்க உயிர                                                                          ---தி.ம.இராமலிங்கம்.

கலை அறிவும் அருள் அறிவும்

காரணப்பட்டு ச.மு.க. அருள் நிலையம் வழங்கும் “சன்மார்க்க விவேக விருத்தி” என்னும் மின்னூலில் மார்ச்-2017 ஆம் மாதம் வெளிவந்தவை:

கலை அறிவும் அருள் அறிவும்

பத்து ஆள்சுமை ஒரு வண்டிப் பாரம். நானூறு வண்டிச் சுமை ஒரு சூல்வண்டிப் பாரம். சூல்வண்டி ஆயிரங்கொண்ட நூல்களை ஒரு ஜென்மத்தில் ஒருவன் அதிதீவிர ஜீவமுயற்சியால் படிக்கச் சிறிய உபாசனைச் சகாயத்தால் முடியும். அப்படிப்பட்டவன் ஆயிரம் ஜென்மம் எடுத்துப் படிக்கும் கலைஅறிவை, ஒருவன் அருள்முன்னிடமாகச் சுத்த சிவ நோக்கத்தால் அறியத் தொடங்கினால், ஒரு கணத்தில் படித்துக் கொள்ளலாம். இது சத்தியம்.

                                       ---திருவருட்பிரகாச வள்ளலார்

தொட்டனைத் தூறும் மணற்கேணி மாந்தர்க்குக்

கற்றனைத் தூறும் அறிவு.

நாம் நமது கைகளைத் தொட்டு, மணல் குழியில் எவ்வளவு ஆழம் எடுக்கிறோமோ அந்த ஆழத்திற்கு தகுந்தவாறு நமக்கு நீர் கிடைக்கும். அதுபோல நாம் எவ்வளவு புத்தகங்களைப் படிக்கிறோமோ அந்த அளவிற்காண அறிவு நமக்குக் கிடைக்கும் என்பது திருவள்ளுவர் வாக்கு. புத்தகத்தைப் படிப்பதின் மூலம் நமக்குக் கிடைக்கும் அறிவை, கலை அறிவு என்கிறோம்.

        ஒருவன் ஒரு ஜென்மத்தில் எத்தனை புத்தகத்தை படித்துவிட முடியும்? நாம் நமது வாழ்க்கை முறையை எடுத்துக்கொண்டால், நாம் வாழும் ஆயுளில் சுமார் ஆயிரம் நூல்களை படித்துவிட முடியும். அதுவே மிகவும் முயற்சி செய்தால்தான் படிக்க முடியும். இவ்வுலகில் 90 சதவிகித மக்கள் தமது வாழ்நாளில் 100 புத்தகங்களை முழுதும் படித்து முடித்திருப்பதே அரிது. இந்த 90 சதவிகித மக்களும் 100 புத்தக அறிவைக்கொண்டே அரசியலிலும், செல்வாக்கிலும், செல்வத்திலும், வறுமையிலும், அடிமையாகவும், கொலைஞர்களாகவும், புலையர்களாகவும், கலைஞர்களாகவும், புலவர்களாகவும், நல்லவர்களாகவும், தீயவர்களாகவும், ஒழுக்கம் மிகுந்தவர்களாகவும், சாமியார்களாகவும், ஞானிகளாகவும் இப்படி பல்வேறு முகபாவங்களை அவர்கள் ஏற்றுள்ள ஒரு ஜென்மத்தில் முடித்துவிட்டு அடுத்த ஜென்மம் நோக்கி பயணப்படுகின்றார்கள்.

        இவர்களே தாம் எடுத்த அந்த ஜென்மத்தில் ஆயிரம் நூல்களை கற்றறிந்தால் அவர்களது அறிவு எப்படி சுடர்விட்டு பிரகாசிக்கும் என்று எண்ணிப்பாருங்கள். இப்படி எண்ணும்போதுதான் வள்ளற்பெருமான் குறுக்கிடுகின்றார். ஒரு ஜென்மத்தில் ஆயிரம் நூல்தானா? அவ்வெண்ணிக்கை தூசு போன்றது. இதோ நான் ஒரு கணக்கு வைத்திருக்கின்றேன். அதன்படி கற்றதுதான் என்னுடைய அறிவு என்கின்றார். அது என்ன கணக்கு?, அதனையும் பார்த்துவிடுவோமா…   

ஒரு ஆள் சுமை என்பது சுமார் 60 கிலோ என்று வைத்துக்கொள்வோம். பத்து ஆள் சுமை என்பது 600 கிலோ ஆகும். 600 கிலோ என்பது ஒரு வண்டிப்பாரம். இப்படி 400 வண்டிச் சுமை கொண்டது 2,40,000 கிலோ ஆகும். 2,40,000 கிலோ கொண்டது ஒரு சூல்வண்டிப் பாரமாகும். சூல் வண்டி ஆயிரம் கொண்டது 24,00,00,000 கிலோ ஆகும். 24 கோடி கிலோ எடையுள்ள (2,40,000 டன்) புத்தகத்தை ஒருவன் தான் எடுத்த இந்த ஜென்மத்தில் அதிதீவிர முயற்சி எடுத்தால் படித்து முடிக்கலாம் என்பது வள்ளலாரின் கணக்கு.

       

        இன்னும் இதனை விளக்கமாகப் பார்ப்போம். நமக்குத் தெரிந்த ஆறு திருமுறைகள் கொண்ட திருவருட்பா நூல் என்பது சுமார் 10 கிலோ இருப்பதாகக் கொண்டால், 2கோடியே 40 லட்சம் திருவருட்பா போன்ற நூல்களை நாம் இந்த ஜென்மத்தில் அதிதீவிர முயற்சி எடுத்தால் படித்து முடிக்கலாம் என்றாகின்றது. அதாவது ஆறுதிருமுறை கொண்ட திருவருட்பா நூலை 2,40,00,000 முறை முழுதும் படிப்பதற்கு சமம். ஒருவன் ஒரு ஜென்மத்தில் 120 வயதை ஆயுளாகக் கொண்டால், முதல் மற்றும் இறுதி 10 ஆண்டுகளை கழித்துவிட்டால், மீதம் உள்ள 100 ஆண்டுகளில் 36,500 நாட்களே அவனுக்கு உள்ளது. இந்த 36,500 நாட்களில் அதிதீவிர முயற்சி எடுத்து ஒரு நாளைக்கு 657 முறை 10 கிலோ எடையுள்ள நூல்களை படித்து முடிக்க வேண்டும். இது முடியுமா என்றால், சிறிய உபாசனைச் சகாயத்தால் முடியும் என்கின்றார் வள்ளலார்.

        இவ்வாறு ஒருவன் ஒரு ஜென்மத்தில் ஒரு நாளைக்கு 657 - 10 கிலோ எடையுள்ள நூலை 100 வருடம் வரை படித்துக்கொண்டு, அவன் மீண்டும் மீண்டும் இதே மாதிரி 1000 ஜென்மம் எடுத்து தொடர்ந்து படித்துக்கொண்டே வந்தால், 2400,00,00,000 (2,400 கோடி கிலோ) நூல்களை அவன் படித்து முடித்திருப்பான். என்ன… தலை சுற்றுகிறது அல்லவா!!!....!!! (இவ்வுலகில் இவ்வளவு நூல்கள் இருக்கின்றதா என்பதே சந்தேகம்). 1000 ஜென்மத்தில் 10 கிலோ எடையுள்ள 2,400 கோடி புத்தகங்களை படிப்பவன் ஒருவன், அருள் முன்னிடமாகச் சுத்த சிவ நோக்கத்தால் அறியத் தொடங்கினால், இவ்வளவு நூல்களையும் ஒரே கணத்தில் / ஒரே நொடியில் படித்துக்கொள்ளலாம் என்கின்றார் வள்ளலார். இந்த அருள் செய்தியினை சும்மா படிக்கவே தலைசுற்றுகின்றதே… ஒரு வகையில் சந்தேகம் எழுகின்றதே… என்றெல்லாம் நாம் நினைப்போம் என்றுதான்… வள்ளலார் இந்தச் செய்தியினை சொல்லி முடித்தவுடன்… “இது சத்தியம்” என்று இச்செய்திக்கு ஒரு முக்கியத்துவம் கொடுக்கின்றார்.“இது சத்தியம்” என்று சொன்ன பிறகு இதனை யாரேனும் அலட்சியப் படுத்த முடியுமா?

        இப்படித்தான் வள்ளற்பெருமான் ஓதாது இவ்வுலகில் உள்ள நூல்களை எல்லாம் ஒரே நொடியில் படித்து முடித்தார். அவர் தம்முடைய அனுபவத்தைத்தான் மேலே உரைநடையிலும், திரு அகவல் வரிகளிலும் வெளிப்படுத்தியுள்ளார்.

        சுத்த சன்மார்க்க அனுபவம் என்பது சுத்த சிவ துரியாதீத நிலையாகும். அப்படிப்பட்ட சுத்த சிவ அனுபவத்தை நான் பெறுதல் வேண்டும் என்ற நோக்கமுடன், ஜீவகாருண்யத்தால் பெறப்படும் இறையருள் முன்னிடமாக, ஒருவன் அறியத் தொடங்கினால் அதாவது அருள் அறிவைக்கொண்டு அறியத்தொடங்கினால், ஆயிரம் ஜென்மத்தில் படித்து முடிக்கக்கூடிய நூல்களை எல்லாம் ஒரே நொடியில் கற்று முடித்துவிடலாம். எனவே அருள் அறிவு பெற்றுவிட்டால் கலையறிவு எல்லாம் நொடியில் படிக்காமலேயே நமக்குக் கிடைத்துவிடும் என்பதே இதில் உள்ள செய்தியாகும்.

                                                    ---தி.ம.இராமலிங்கம்.

சன்மார்க்க விவேக விருத்தி – மார்ச்-2017

சன்மார்க்க விவேக விருத்தி – மார்ச்-2017

அன்பர்களுக்குவந்தனம்!

வள்ளலாரின் அணுக்கத் தொண்டர் காரணப்பட்டு ச.மு.க. அருள் நிலையம் வழங்கும், வள்ளற்பெருமான் அருளிய "சன்மார்க்க விவேக விருத்தி" என்கிற மாதாந்திர மின்னிதழினை கீழ்காணும் இணைப்பினை சுட்டி பதிவிறக்கம் செய்து படித்துப்பயனுறலாம். நன்றி.

இந்த மின்னூல் உங்கள் கைப்பேசியில் பதிவிறக்கம் செய்ய 9445545475 என்கின்ற வாட்ஸ் ஆப் எண்ணை அணுகலாம்.

அல்லது உங்கள் வாட்ஸ் ஆப் எண்ணை இங்கே பதிவிடவும்.

http://www.vallalarspace.com/user/c/V000023413B

or

https://drive.google.com/file/d/0B-1Hedu-YZTWYWg0NEJHN3ZSVk0/view?usp=sharing

பிக்குகள்

காரணப்பட்டு ச.மு.க. அருள் நிலையம் வழங்கும் ‘சன்மார்க்க விவேக விருத்தி’ என்னும் மின்னூலில் பிப்ரவரி 2017-ஆம் மாதம் வெளிவந்தவை:

பிக்குகள்

========

 

ஏகாந்த இடத்தில் வசித்து, மன அமைதி பெற்று, உலகத்தின் உண்மை நிலையைக் காண்கின்ற, நற்காட்சி அடைந்துள்ள பிக்குவானவர், மனிதரால் காண முடியாத இன்பத்தை அடைகின்றார்.

ஓ பிக்குகளே! மல்லிகைச் செடி வாடிய பூவை உதிர்த்து விடுவது போல, ஆசைகளையும் வெறுப்பையும் (ராகத் துவேஷங்களை) உதிர்த்து விடுங்கள்.

ஞானம் (அறிவு) இல்லாதவருக்குத் தியானம் (மன அடக்கம்) இல்லை. தியானம் இல்லாதவருக்கு ஞானம் இல்லை. யார் தியானமும் ஞானமும் உள்ளவரோ அவர், மோட்சத்தின் அருகில் இருக்கின்றார்.

பிக்குவே! சிந்தித்துப்பார். அசட்டையாயிராதே. காம எண்ணங்களில் உன் மனத்தைச் சுழல விடாதே. அசட்டைத்தனத்தினாலே, பழுக்கக் காய்ந்த நெருப்பைக் கக்கும் இரும்பு உருண்டைகளை விழுங்காதே. அது சுடும்போது ‘இது துக்கம்’ என்று கதறாதே.

பிக்கு ஒருவர், தன்னுடைய ஊதியம் சிறிதாக இருந்தாலும் அதை இகழாமல் இருப்பாரானால், தேவர்களும் அவரைப் புகழ்கிறார்கள். ஏனென்றால் அவருடைய வாழ்க்கை தூய்மையானதாகவும் ஊக்கமுள்ளதாகவும் இருக்கின்றது.

பிக்குவாக உள்ள ஒருவர் தமது சொந்த லாபத்தை அலட்சியமாக எண்ணக்கூடாது. பிறருடைய ஊதியத்தைக் கண்டு பொறாமைப்படவும் கூடாது. மற்றவருடைய ஊதியத்தைக் கண்டு பொறாமைப் படுகின்றவர் சமாதி (மன அடக்கம்) பெறமாட்டார்.

தர்மோபதேசப்படி நடந்து, தர்மோபதேசத்தில் மனம் மகிழ்ந்து, தர்மோபதேசத்தை என்னேரமும் சிந்தித்துக் கொண்டு, தர்மத்தை மறவாமல் இருக்கின்ற பிக்கு, உண்மையில் தர்மத்திலிருந்து தவற மாட்டார்.

புத்தருடைய உபதேசங்களில் மனத்தைச் செலுத்துகின்ற இளைய பிக்குவானவர், மேகத்திலிருந்து வெளிப்பட்ட வெண்ணிலாவைப் போன்று உலகத்தில் ஒளிவிட்டு விளங்குகின்றார்.

ஒருவர் தானே தனக்குப் புகலிடமாம். ஒருவர் தானே தனக்கு எதிர்கால வாழ்க்கையை நியமிக்கின்றார். ஆகையினாலே குதிரை வாணிகர் உயர்ந்த இனத்துக் குதிரையை அடக்குவது போல, நீ உன்னிடமுள்ள ‘நான்’ என்பதை அடக்கு.

உடல் அடக்கம், வாக்கு அடக்கம், மன அடக்கம் உடையவராய் இவற்றில் நன்கு பயின்று பாவங்களை நீக்கினவர் யாரோ அவர் ‘உபசந்தர்’ என்று கூறப்படுகின்றார்.