வெண்ணிலாவே… வெண்ணிலாவே…

வெண்ணிலாவே… வெண்ணிலாவே…

=============================

வானுயர்ந்து போகின்ற வெண்னிலாவே – நான்

வணங்கத் தாழ்வதென்ன வெண்ணிலாவே.

சித்தரெல்லாம் போற்றுகின்ற வெண்ணிலாவே – எனக்கு

முத்திநலம் சொன்னதென்ன வெண்ணிலாவே.

மணவாளன் நானென்றிட வெண்ணிலாவே – நாணி

உன்கன்னமெல்லாம் சிவந்ததென்ன வெண்ணிலாவே.

சிற்றின்பம் காண்பவர்க்கு வெண்ணிலாவே – நீயே

பெண்ணின்பம் ஆவதென்ன வெண்ணிலாவே.

பெண்ணின்பம் ஆண்ணின்பம் வெண்ணிலாவே – அவை

தன்னின்பம் வென்றிடுமோ வெண்ணிலாவே.

பேரின்பம் கண்டிடவே வெண்ணிலாவே – இரு

பாலின்பம் வென்றிடுவாய் வெண்ணிலாவே.

தொட்டுவிட ஆசைவைத்தேன் வெண்ணிலாவே – நீயும்

வெட்டவெளி சென்றதென்ன வெண்ணிலாவே.

துன்பமின்றி வாழ்ந்திடவே வெண்ணிலாவே – இங்கு

அன்பாயொளி வீசிடுவாய் வெண்ணிலாவே.

சுற்றிசுற்றி வருகின்ற வெண்ணிலாவே – என்னை

பற்றிட ஓராசைவையாய் வெண்ணிலாவே.

சன்மார்க்கம் விளங்கிடவே வெண்ணிலாவே – நீயும்

விண்மார்க்கம் வருகின்றாய் வெண்ணிலாவே.

வளமாக வாழ்ந்திடவே வெண்ணிலாவே – இருள்

வறுமைகளை போக்கிடுவாய் வெண்ணிலாவே.

சாதிமதம் ஒழிந்திடவே வெண்ணிலாவே – நீயே

போதிமரம் ஆகிடுவாய் வெண்ணிலாவே.

தீராத நோயெல்லாம் வெண்ணிலாவே – உன்னைப்

பார்த்தாலே ஓடிவிடும் வெண்ணிலாவே.

வள்ளல்துணை யாயிருக்க வெண்ணிலாவே – இனி

யார்துணையும் வேண்டேனென் வெண்ணிலாவே.

தயவுதயவு என்றிடவே வெண்ணிலாவே – பாடை

பயமெல்லாம் போனதென்ன வெண்ணிலாவே.

ஏழுதிரை மாயைகளும் வெண்ணிலாவே – சிற்சபை

வாழுமவன் நீக்கிடுவான் வெண்ணிலாவே.

கொலைபுலையை விடுவதே வெண்ணிலாவே – ஒரு

தலையாய தருமமென்றாய் வெண்ணிலாவே.

பசித்தோர் முகங்கண்டுவிட்டால் வெண்ணிலாவே – நீயும்

புசிக்க உணவுதந்திடுவாய் வெண்ணிலாவே.

நூல்லெல்லாம் பொய்யெனவே வெண்ணிலாவே – அருட்

பாலருந்தி உரைக்கின்றேன் வெண்ணிலாவே.

மதம்பிடித்தே அலைகின்றார் வெண்ணிலாவே – மடிய

விதவிதமாய் சாமிகண்டார் வெண்ணிலாவே.

செத்தாரை எரிக்கின்றார் வெண்ணிலாவே – இவர்

சூடுசுரணை யற்றவரே வெண்ணிலாவே.

உண்டதெல்லாம் மலமென்றாய் வெண்ணிலாவே – அந்த

மலங்காணா உடல்தாராய் வெண்ணிலாவே.

விடமெல்லாம் ஒழிந்ததே வெண்ணிலாவே – என்

உடம்பெல்லாம் சூடுகண்டேன் வெண்ணிலாவே.

பிறவியெல்லாம் கண்டுவந்தேன் வெண்ணிலாவே – இனி

பிறக்காமல் கண்டிருப்பேன் வெண்ணிலாவே.

இறப்பென்னும் பெருங்கடலில் வெண்ணிலாவே – நானும்

இறங்காமல் மேலெழுந்தேன் வெண்ணிலாவே.

நன்றிநன்றி நன்றிசொல்வேன் வெண்ணிலாவே – அந்த

மன்றில் விளையாடுகின்றேன் வெண்ணிலாவே.

சமயக் கடவுளெல்லாம் வெண்ணிலாவே – இங்கே

அபயம் அபயமென்றார் வெண்ணிலாவே.

சரணம் சரணமென்று வெண்ணிலாவே – நானும்

மரணமின்றி வாழுகின்றேன் வெண்ணிலாவே.

ஞானசபைக் குள்ளேசென்று வெண்ணிலாவே – என்

மானம் காத்துக்கொண்டேன்என் வெண்ணிலாவே.

வாழ்க வாழ்கவாழ்கவென்ற வெண்ணிலாவே – எல்லா

உயிருள்ளும் நீவாழுகின்றாய் வெண்ணிலாவே.

சுத்தநடம் கண்டிடவே வெண்ணிலாவே – என்

பித்தமெல்லாம் போனதென்ன வெண்ணிலாவே.

உன்புகழைப் பாடுகையில் வெண்ணிலாவே – பெற்ற

அன்னை மனங்குளிராதோ வெண்ணிலாவே.

விந்துநாதம் வென்றிடவே வெண்ணிலாவே – எனது

தந்தை மகிழ்வாரோசொல்லாய் வெண்ணிலாவே.

இன்பமிது இன்பமிது வெண்ணிலாவே – சுத்த

சன்மார்க்க இன்பமிது வெண்ணிலாவே.

காலமெல்லாம் நானிருப்பேன் வெண்ணிலாவே – அந்த

காலன் என்னடிமையானான் வெண்ணிலாவே.

வேதித்த உடம்பிதுவே வெண்ணிலாவே – எந்த

வேதம் கண்டதிதுசொல்லாய் வெண்ணிலாவே.

மூவுருவம் கொண்டுவிட்டேன் வெண்ணிலாவே – இனி

யாருருவமும் கொண்டிடுவேன் வெண்ணிலாவே.

நித்தமும் நீகண்டிடவே வெண்ணிலாவே – இங்கே

செத்தவரை எழுப்புகின்றேன் வெண்ணிலாவே.

கண்ணிரண்டும் ஒளிவீச வெண்ணிலாவே – மேனிப்

புண்ணும் பொன்னானதென்ன வெண்ணிலாவே.

சாகாக்கலை கற்றுவந்தேன் வெண்ணிலாவே – உனை

நோகாமல் காத்திடுவேன் வெண்ணிலாவே.

வள்ளல்துணை வேண்டிடவே வெண்ணிலாவே – உள்ள

கள்ளமெல்லாம் விட்டுவிட்டேன் வெண்ணிலாவே.

ஏறி விளையாடுகின்றேன் வெண்ணிலாவே – அங்கே

அமுதூற உண்ணுகின்றேன் வெண்ணிலாவே.

பட்டதெல்லாம் போதுமென்றாய் வெண்ணிலாவே – உலகில்

விட்டகுறை ஏதுமில்லை வெண்ணிலாவே.

நாதனிருக்கு மிடத்தினிலே வெண்ணிலாவே – நானும்

போதம்காண செல்லுகின்றேன் வெண்ணிலாவே.

எனக்குநேர் எனநீஇருக்க வெண்ணிலாவே – எங்கும்

ஓர்குறையும் இல்லைஎன் வெண்ணிலாவே.

                                                             --- திருச்சபை.

                                     --- தி.ம.இராமலிங்கம்.